Sama ke Saboak

Mau deng Peu bar bangun pagi, tadi malam nonton bola kaki di kawan pung rumah.

“Peu bangun su, kopi su siap ni…! B pung Mama ada goreng pisang, masih panas.”

Peu masi masanggorok, dia ada mimpi enak ni. Katumu kawan lama dong, bauji lari abis sakola, deng su mau deka finis, Mau kosi Peu kas bangun.

“Bangun su, son lama botong su dapa batarea dar mamtua. Mama ada suruh turun pi beli ikan di Oesapa...bangun su, ko lu yang pegang tas ikan...”

Peu yang su hampir sonto garis finis bangun denga pata-pata bedan...”Wi tidur pung enak lai...”

Mau su jengkel. “Lu enak, ma lu kosi beta...turun dar tampa tidur!”

“Sori kawan, te itumangkali pas be mimpi batumbu deng ana-ana bawa dong! Be ada bela lu, itu satu mau datang batamba makanya be kosi dia di kuk...ma son sangaja tandang lu.”

“Peu lu ni kuat alasan...mot itu kopi deng pisang ko botong kaluar su.”

Omong sat kali sa, Peu langsung kabas pisang goreng deng kopi sampe rata.

Sampe di Oesapa, orang-orang dong ada dudu deng ember. Ini hari ikan kosong kawan.

“Aduh pamang….ikan tar ada ko…” Mau tanya juraga bagan ni.

“Itu sudah anak, ikan ada susah...mana orang bilang minya mau nae lai, biasa jam bagini ana-ana dong su pulang, ini pasti ikan kosong betul..”

Bukan hanya pamang yang susah, ama deng ina yang duduk tunggu ada susa ju...ini papalele dong su kapala saki ni.

“Ini kalo ikan sadiki na biar sa, be son ambel...te ini langganan dong nanti maki ancor beta,” omong satu ana muda.

“Ho bagitu su...ais mo karmana lae, mau badara...?” hantam kawan.

“Ana, sapa yang gubernur NTT ni?” pamang tanya di Mau.

“Son tau...samua muka jelek abis, ma tarsampat ko mau maju?” Mau jawab yakin.

“Lu pikir kalo orang muka ganteng dong lebe bae ko?” Peu tanya bale.

“Mangkali bagitu, ko lu lia sa Dede sapa tu manang di Jawa Barat, be rasa ibu-ibu dong pasti tusuk dia sa...kok yang laen muka tua tu...”

“Bisa jadi, jadi kalau botong pung pamang tunggu sa, lia sapa yang paling ganteng baru dia yang manang...te botong artis kurang”

Pamang su bingung, son mangarti, mana yang ganteng...ko selama ini son ada yang tau artis NTT, ma dia parnah dengar Trio Sonbilo dari SoE suara bagus ju menurut pamang.

“Karmana kalo Trio Sonbilo?” Pamang tanya.

“Barani sa dong yang maju jadi gubernur, bosong jang pikir itu tua-tua dong dapa tampa...orang lebe bae pilih dong sa!”Mau jawab.

“Trio Sonbilo pung lagu ju dulu ada yang larang tu....”Peu sambung.

“Jang kalo-kalo do, te sakarang ni, sapa sa yang mau maju harus sese doi banyak, jadi son gampang, saparo ni kalo son jadi maju opname samua di UGD rame-rame...ko doi su abis banyak ma sonde jadi ju...”

“Kalo Pamang suka sapa yang jadi gubernur?”

“Botong orang kici anak, sapa yang jadi gubernur bae sa, ko dong nae kotong tangka ikang, dong sonde naik kotong tetap tangka ikang, son ada beda…”

“Ho e....jadi dong bikin apa sa di atas?”Mau tanya bale.

“Babagi doi to, bosong lia sa, dulu biasa-biasa sa....ma kal su jadi pajabat, muka dong su mangkilat abis...wangi abis...” Peu jawab.

“Ko lu ini ada pi cium dong ko?”

“Makanya jadi orang tu Mau, bergaul...kalo pas Natal pi selamat di rumah jabatan, biar duduk kok makan kue, deng pi lia dong model karmana di sana...”

“Jadi dong son susah ko?” tanya Mau.

“Ko mau susah apa lai? Mau pi beli roko sa ajudan yang lari....mau pi beli jagong bakar ana bua yang lari, mau beli pulsa ada yang transfer...samua su ada...”

“Enak ju jadi bos e....Peu!”

“Kalo sonde enak na sapa yang mau nae, ada ju yang nae lupa turun...”

“Karmana o ada orang yang nae pohon tuak lupa turun pi bawah?”

“Jadi laru to?”

“Hahaha....mangkali ju, saparo su jadi saboak....Pamang botong jalan su, te ikan son ada ni...” MaU pamit ko jalan pi tampa motor. Sadiki lai dia pung Bapa mau pake motor jadi harus capat-capat (Bram) .